Paper Article

මම විවාහයක් ගැන හීනයක්වත් දකින්නේ නෑ-ජනප්‍රිය සුරූපී නිලි ඩිලුක්ෂි කාවින්ද්‍යා වීරපෙරුම

අපේ කලා ක්ෂේත්‍රයේ ඉන්න දක්ෂ ජනප්‍රිය රංගන ශිල්පිනියක් තමයි ඩිලුක්ෂි කාවින්ද්‍යා වීරපෙරුම කියලා කියන්නේ. ඉතින් ඒ වගේම විකාශනය අවසන් වූ දෙරණ නාළිකාවේ ලොක්කි ටෙලි නාට්‍යයේ ප්‍රවීණාගේ චරිතය හරහා වගේම ධරණී ටෙලිනාට්‍ය හරහා ඇය බොහෝ දෙනෙකුගේ ආදරය දිනාගත්තා. කොහොම නමුත් රංගනයට දවසින් දවස අලුත් අලුත් මුහුණු එක් වූවත් ඉතා සාර්ථක ලෙස ප්‍රහසනය මැවිය හැකි නළු නිළියන් බිහිවන්නේ කලාතුරකින්. ඉතින් ඩිලුක්ෂි වර්තමානයේ බිහිව අති සාර්ථකම ප්‍රහසනය මවන්නිය බව ලොක්කි ටෙලි නාට්‍යයෙන් ඔප්පු කර හමාරයි. ඉතින් මේ සුරූපී රංගන ශිල්පිනිය පුවත්පත් මාධ්‍ය සාකච්චාවක් එක්ක එකතුවෙමින් ඇයගේ අලුත්ම තොරතුරු ගැන කතා බහ කරලා තිබුනේ මෙන්න මේ විදිහටයි.

ලොක්කි ටෙලි නාට්‍යයේ අධ්‍යක්ෂ හර්ෂ උඩකන්ද අයියා මට මේ චරිතය ගැන කිව්වම වගේම මේ පිටපත් කියවද්දී මට මේ චරිතය කරන්න පුළුවන් කියල හිතුණෙ නැහැ. මේක රිස්කි ජොබ් එකක්. මම කරන දෙයින් ප්‍රෙක්ෂකයා හිනා ගස්වන්න බැරි වුණොත් මම ෆේල්නේ. මම මීට පෙර ප්‍රහසන චරිත කරලා තිබුණෙත් නැහැ. ඒ නිසා මම මේ ගැන ගොඩක් හිතුවා.

ප්‍රවීනා කියන්නෙ පොෂ් කෙනෙක් නොවුණට බොරු පොෂ් එකක් පෙන්වන කෙනෙක්නේ. ඔය අනේ කියන වචනයට අනා කියන එක එහෙම මට හරිම නුහුරුයි. ඉතින් මම කිහිප වතාවක් කණ්ණාඩිය ඉස්සරහට ගිහින් මට ඔය වැඩේ කරන්න පුළුවන්ද කියලා කරලා බැලුවා. ඇත්තටම මේක මට අභියෝගයක්. මම අභියෝගවලට හරිම කැමති කෙනෙක්. ඉස්කෝලෙදිත් මට රඟපාන්න ලැබුණාම මම කළේ මහලු චරිත, එහෙම නැතිනම් පිරිමි චරිත. සාමාන්‍ය දිවියේ විදිහට වෙනස් දේවල් ප්‍රවීනා චරිතයෙ රූගතකිරීම් වලින් පස්සෙ මම හිතුවටත් වඩා හොඳින් වැඩේ කෙරුණා. ප්‍රතිචාරත් ඒ වගේමයි. මේ වෙත්දි මම ටෙලි නාට්‍ය දහයක විතර රඟපාලා තියෙනවා. හැබැයි ප්‍රවීනාගේ චරිතයට තමයි වැඩිම ප්‍රතිචාර තියෙන්නේ.

පාරෙ යද්දි රසික රසිකවියෝ මාස්ක් දාගෙන හිටියත් මාව අඳුරගන්නවා. අනා කියල ළඟට ඇවිත් කතා කරනවා. සිංදුවක් කියන්න කියනවා. මාත් එක්ක ෆොටෝ ගන්නවා. ඇත්තටම මේ දවස්වල ප්‍රවීනා නිසා මම රසික රසිකාවියන්ගෙන් සුන්දර ආදරයක් විඳිනවා. හැබැයි මට මේක නුහුරුයි. මම ජනප්‍රියත්වය බලාපොරොත්තු වුණ කෙනෙක් නෙවෙයි.

ආයෙත් ප්‍රවීනා වගේම චරිතයක් මම තවත් නිර්මාණයක කරනවා කියන එක මම හිතන්නේ මම ඒ චරිතයට කරන හානියක් කියලා. හැබැයි කොමඩි චරිත ඉදිරියේදී ලැබුණොත් මම අනිවාර්යෙන්ම බාරගන්නවා ප්‍රවීනා වගේම වෙනසක් කරන්න උත්සාහ කරනවා. සාමාන්‍ය ජීවිතයෙත් මම හරිම පිස්සු චරිතයක් සැහැල්ලුවට ඉන්න කෙනෙක්. ඒ වගේම මම හරිම රොමැන්ටික් චරිතයක්. නමුත් මට තවම තිරයේ පෙම්වතිගේ චරිතයක් ලැබිලා නැහැ. මම හරිම ආසාවෙන් ඉන්නවා පෙම්වතියකගේ චරිතයක් රඟපාන්න.

මේ තරම් දුෂ්ට චරිත ලැබෙන්න හේතුව මගේ කටහඬ ගොරෝසුයි මම හයියෙන් කතා කරනවා. මම අඳින පළඳින, හැසිරෙන විදිහ නිසා වෙන්නැති. හැබැයි මම ඇත්තටම චුට්ටක්වත් දුෂ්ට කෙනෙක් නෙවෙයි. දැන් ඉතින් දුෂ්ට චරිතම එක දිගට කරලා තියෙන නිසා ඉදිරි කාලේ මම දුෂ්ට චරිත බාරගන්න එක ටිකක් සීමා කරන්නයි හිතාගෙන ඉන්නේ.

මම පුංචි කාලෙ කියන්නේ මම මාව සිනමා තිරයේ හරි රුපවාහිනී තිරයේ හරි දකින්න ආසයි කියලා. මම අධ්‍යාපනය ලැබුවේ විශාකා විද්‍යාලයේ. ඉස්කෝලෝ කාලේ එළියේ රංගන කටයුතුවලට යන්න බැරි වුණත් ඉස්කෝලේ මම රඟපෑවා, නර්තනය කළා. මම භරත නාට්‍යයම් කරලා අරංගේත්‍රම් පැවැත්වූවා. උඩරට නර්තනය හදාරලා පාහින්පත් මංගල්‍ය තිබ්බා. සම්මාන දිනුවා, ජයග්‍රහණ ලැබුවා. නර්තනයයි, රංගනයයි තමයි මගේ ජීවිතයේ ලොකුම හීනය වුණේ. ඒ හීනය සැබෑ කරගන්න මගේ අක්කා දෙනුෂ්කා වීරපෙරුම සිනමා හා ටෙලි නිළියක් වීම බලපෑවා.

අක්කගෙ යාළුවෙක් තමයි ජනිත් වික්‍රමගේ අයියා. ඒ හැඳුනුම්කමට මට ගෝත්‍රා චිත්‍රපටයේ රඟපාන්න ලැබුණා. ඊට පස්සෙ දමිත් ෆොන්සේකා මහත්මයගේ පළමු චිත්‍රපට අධ්‍යක්ෂණය වන බෆලෝ ට්‍රැවල් චිත්‍රපටයේ ප්‍රධාන චරිතයට ඇරයුම් ලැබුණා. චිත්‍රපට දෙකක රඟපෑවට පසුව මගේ පළමු ටෙලි නාට්‍යය වන සල්සපුනා සඳහා අරයුම් ලැබෙනවා. ඊට පස්සේ මම දෙරණ මිස් ශ්‍රී ලංකා තරගයට ඉදිරිපත් වුණා. ඒ අතර මට රාවණ සීසන් 1 හා 2හි සූර්යමුඛීගේ චරිතය ලැබෙනවා. ඊට පස්සේ දිගටම මට රංගන අවස්ථා හිමිවෙනවා.

අපේ අම්මා කියනවා මම පොඩි කාලේ කිව්වලු මම අවුරුදු 23දි බඳිනව කියලා. ඒත් ලබන පෙබරවාරියට මට 25ක් වෙනවා. දැන් අපේ නැන්දලා එහෙම විහිළු කරනවා දැන් ඉතින් බඳිමු කියලා. ඒත් මට දැන් නම් විවාහ වීමේ කිසිම අදහසක් නැහැ. මම ස්වාධීන ජීවිතයකට කැමති කෙනෙක්. මම කැමතියි මගේම මහන්සියෙන් හම්බ කරලා මගේ අම්මයි තාත්තයි බලාගන්න පුළුවන් නිදහස් ජීවිතයක් ගොඩනගා ගන්න.

මම කියන්නේ මට ආදරය දැනෙන්නෙ නැති කෙනෙක් කියලා නෙවෙයි. මගේ ජීවිතයේ පෙම් සබඳතා තිබිලා තියෙනවා. අදටත් මම කැමති කෙනෙක් ඉන්නවා. ඒත් මම ඒ සබඳතා වෙනුවෙන් වැඩිපුර කාලය මිඩංගු කරන්න කැමති නැහැ. මොකද මම දන්නවා අන්තිමට මට ඉතිරිවෙන්නේ මමයි, මගේ අම්මයි, තාත්තයි කියලා. ආදරයක් වෙනුවෙන් ජීවිතය කැප කරලා විරහව නිසා තැවි තැවී හඬ හඬා ඉන්න කාලය කැප කරන්න මම සූදානම් නැහැ. ඒ නිසා විවාහයක් ගැන නම් මම හීනයක්වත් දකින්නෙ නැහැ. නමුත් ජීවිතවලට හැමවිටම දෛවය ලබා දෙන්නේ අපි නොපැතූ දේවල්නේ. ඒ නිසා ඉදිරි කාලයේ මොනවා වෙයිද කියන්න බැහැ කියලයි මේ දක්ෂ සුරූපී රංගන ශිල්පිනිය අවසාන වශයෙන් පවසලා තිබුනේ.