Paper Article

ගොඩක් අය දන්නේ නැහැ මගේ දෙමව්පියෝ කුසුම් රේණු, ශ්‍රියන්ත මෙන්ඩිස් කියලා-හඩකැවීම් ශිල්පිනී තාරුකි අමායා

තාරුකි අමායා මෙන්ඩිස් කියලා කියන්නේ අපේ රටේ හඬ කැවීම් ක්ෂේත්‍රය තුළ හොඳ නමක් දිනාගෙන ඉන්න දක්ෂ හඬකැවීම් ශිල්පිනියක්. කොහොම නමුත් තවමත් ටෙලි තිරයේ හෝ සිනමා තිරයේ අපිට ඇයගේ රුව දකින්නට නොලැබුණත් ඇය අපේ රටේ දක්ෂ ජනප්‍රිය ප්‍රවීණ කළා යුවලක් වන ශ්‍රියන්ත මෙන්ඩිස් හා කුසුම් රේණුගේ ආදරණීය පොඩි දුවයි. ඉතින් මේ දක්ෂ කළා ශිල්පිනිය පහුගිය දවසක පුවත්පත් මාධ්‍ය සාකච්චාවක් එක්ක එකතුවෙමින් කතා බහ කරලා තිබුනේ මෙන්න මේ විදිහටයි.

මේ කාලයේ නම් මට එතරම් කාර්යබහුල කාලයක් නෙවෙයි. සරලව සාමාන්‍ය විදියට ගතවෙනවා. ඒ අතරේ දෙරණ නාළිකාවේ හඬකැවීම් කටයුතුවලට සහභාගි වෙනවා. ඉතින් ඒ වගේම ඉස්සර ඉඳන් හඬකැවීම් කරපු මම දැන් වේදිකා නාට්‍ය දෙකකට සම්බන්ධ වෙලා ඉන්නවා. සුබ සහ යස වේදිකා නාට්‍යය සහ රාස්ස පරාස වේදිකා නාට්‍යයට. ඉතින් ඒ වගේම ඉදිරියේදී මම කැමැතිම අධ්‍යක්ෂවරයෙක් යටතේ ටෙලි නිර්මාණයකට සම්බන්ධ වෙන්න බලාපොරොත්තුවෙන් ඉන්නවා.

ඇත්තටම මට රංගනය පැත්තට ලොකු කැමැත්තක් තිබ්බේ නැහැ. විවිධ අවස්ථාවලදී රංගනයට ආරාධනා ආවත් තිබ්බ අකැමැත්ත හින්දම භාර ගත්තේ නැහැ. මගේ ළමා කාලය ගත්තම මම ෆොටෝ එකකටවත් පෙනී ඉන්න කැමැති කෙනෙක් නෙවෙයි. අම්මගේ තාත්තගේ අඳුරන පත්තරවල ඡායාරූප ශිල්පීන් දැන් හමුවුණාමත් අහන්නේ මෙයා නේද අර ෆොටෝ ගන්නකොට මූණ හංග ගන්නේ කියලා. එච්චරට හැමෝටම මතකයි මම ෆොටෝ එකකටවත් ඉන්න කැමති නැහැ.

සමහරු දන්නෙත් නැහැ මගේ අම්මා තාත්තා කලාකරුවන් වන ශ්‍රියන්ත, කුසුම් කියලා. දෙමාපිය රැස්වීමකදී විතරයි අම්මා හෝ තාත්තා පාසලට එන්නේ. අක්කයි මමයි හරි අකැමැතියි අම්මා තාත්තා ජනප්‍රිය අය කියලා යාළුවන්වත් දැන ගන්නවට. අදටත් හඬ කැවීම්වලට යද්දී සමහරු දන්නේ නැහැ මම කාගේ කවුද කියලා.

අක්කත් රංගනයට කැමැති නැහැ. ඉස්සර එයා රේඩියෝ කමර්ෂල් වොයිස් කරත් දැන් ඒකත් නතර කරලා ෆැෂන් ඩිසයිනින් පැත්තෙන් එයාගෙම බ්‍රෑන්ඩ් එකත් එක්ක කාර්යබහුල වෙලා නිසා කලාවට සමුදීලා ඉන්නේ. අම්මා, තාත්තා වුනත් කිසිම දෙයකට අපිට බල කරන්නේ නැහැ. එයාලා පෞද්ගලිකව කැමැති ඇති දරුවන් කලා නිර්මාණවලින් දකින්න. ඒ නිසා ඉදිරියේදී නිර්මාණයක් භාර ගන්න සූදානමින් ඉන්න නිසා අම්මටයි තාත්තටයි කැමති ඇති ඒ ගැන.

මම ඇත්තටම පොඩි කාලේ ඉඳන් හරිම නිශ්ශබ්ද, ලජ්ජාශීලී ළමයෙක්. ඒ නිසාමද මන්දා රංගනයට පවා කැමැත්තක් මගේ හිතේ ඇති නොවුණේ. නමුත් ඒ කාලේ ඉදන්ම අම්මව නෝනාවරුනි මහත්වරුනි තුළින් දකින්න අපි ආස කළා. ඒක ඒ කාලේ හිට් එකක්නේ. තාත්තව මායාරත්න තුළින් දකින්න අපි ආස කළා. ඒකේ තාත්තාව යකෙක්ට හැරෙනවනේ. ඉතින් මම ඒ කොටස් යද්දී තාත්තාගේ ඔඩොක්කුවේ ඉඳන්ම ඇස් වහගෙන බලන්නේ. අක්කයි මමයි ආසාවෙන් ඒ අයගේ නිර්මාණ බලන්නේ සහ ඒවා බැලුවට පස්සේ ඒ ගැන අපි පොඩි සාකච්ඡා මට්ටමට එනවා. අදහස් හුවමාරු කර ගන්න රසවින්දනයක් එක්ක තමා නිර්මාණ බැලුවේ.

තාත්තා ගුරුවරයෙක් නිසා වෙන්න ඕනේ ඉස්සර චුට්ටක් සැරයි. අම්මා නම් සැර නැහැ. දැන් නම් දෙන්නම සැර නැහැ. අක්කා විවාහ වෙලා වෙනම පදිංචි වෙලා ඉන්නේ. ගෙදර ඉන්නේ අම්මයි, මමයි, තාත්තයි. රංගනයේදී අම්මා තාත්තා වෙනත් දරුවන්ගේ දෙමාපියෝ වෙද්දී ඒ කාලේ නම් ඉරිසියාවක් හිතුණා. මොකද සමහර නාට්‍යවල විශ්ව කොඩිකාර අයියා හරි කාවිංග අයියා හරි අම්මා එක්ක රඟපාද්දි ගොඩක් සමීප වෙනවා. එදා පටන් අම්මා කියලා තමා කතා කරන්නේ. ඉතින් අපිට හරි තරහයි. අපි අහන්නේ ඇයි එයාලා අපේ අම්මට අම්මා කියන්නේ කියලා. පොඩි කාලේ එහෙම දැනුණට දැන් දැන් නම් එහෙම කතා කරනකොට දැනෙන්නේ ලොකු සතුටක්.

චන්ද්‍ර නන්දනීහි නන්දනී කියන ප්‍රධාන චරිතය තමා මගේ හැඩකැවීමේ පටන් ගැන්ම. ඊට පස්සේ දෙරණ නාළිකාවේ විකාශය වුණු මුතු අහුර. ඒක අවුරුදු තුනයි මාස හතරක් විතර තිබ්බ දීර්ඝ ටෙලි නාට්‍යයක්. එකේ මම කරේ සිමරේගේ චරිතය කියලයි ඇය අවසාන වශයෙන් පවසලා තිබුනේ.